கர்ம யோகமும் கிரியா யோகமும்: ஆன்மீக வெற்றிக்கான புற மற்றும் அக செயல்பாட்டுச் சக்தியைப் பயன்படுத்துதல்

தியானம் மற்றும் ஆன்மீகப் பணிகளில் ஈடுபடுதல், மற்றும் நீங்கள் செய்யும் அனைத்தும் இறைவனுக்காக என்ற சிந்தனையுடன் வேலை செய்வது—அதுவே கர்ம யோகம். தியானத்தில் நீங்கள் இறைவனின் நித்தியப் பேரின்பத்தை உணரும்போது, நீங்கள் உடலுடன் பிணைக்கப்பட்டிருப்பதை ஒரு போதும் உணர மாட்டீர்கள், மேலும் அவனுக்காகப் பணியாற்ற நீங்கள் உற்சாகத்தால் நிரப்பப்படுவீர்கள். நீங்கள் இறைவனை நேசிப்பவராகவும் அதே சமயம் சோம்பேறியாகவும் இருக்க முடியாது. தியானம் செய்து இறைவனை நேசிப்பவர் அவனுக்காகவும் மற்றவர்களுக்காகவும் எப்போதும் சுறுசுறுப்பாக இருப்பார்.

…பலனுக்கான சுயநலப் பற்றின்றி
உங்களுக்கும் உங்கள் அன்புக்குரியவர்களுக்கும் ஆன பொருள்சார் நன்மைகளுக்காக பணம் சம்பாதிப்பதில் மட்டுமே உங்கள் செயற்பாடு மையம் கொள்ளும்போது, அல்லது சுயநலத்துடன் எந்தச் செயலிலும் கவனம் செலுத்தும்போது, நீங்கள் இறைவனிடமிருந்து விலகிச் செல்கிறீர்கள். இவ்வாறு பெரும்பாலான மக்கள் தங்கள் பற்றுகள் மற்றும் மேலும் மேலும் பொருள் கையகப்படுத்தல்களுக்கான ஆசைகளில் தங்கள் ஆற்றல்களை ஈடுபடுத்துகிறார்கள். ஆனால் உங்கள் இயக்கசக்தி இறைவனை நாட பயன்படுத்தப்பட்டவுடன், நீங்கள் அவனை நோக்கி நகர்கிறீர்கள்.

…ஆனால் மனசாட்சி மற்றும் உற்சாகத்துடன்
தன் கடமைகளை தாறுமாறாகவோ அல்லது கவனக்குறைவாகவோ அல்லது ஆர்வமின்றி தியானம் செய்பவரால் இறைவனை மகிழ்விக்கவோ அல்லது ஆன்ம அனுபூதியைப் பெறவோ முடியாது. எந்தவொரு செயலும்—உடல், மன அல்லது ஆன்மீக—தெய்வீக ஐக்கியத்திற்கான விருப்பமே அதன் பலனாகக் கொண்டு செய்யப்படுமாயின், அது “சுயநல” செயல் அல்ல. மாறாக, அது படைப்பில் தெய்வீக நோக்கத்தை நிறைவேற்றுகிறது என்ற அர்த்தத்தில் ஒரு முழுநிறைவான செயல்.