“ప్రపంచానికి పరమహంస యోగానందగారు అందించిన ఆధ్యాత్మికమైన 6 విప్లవాత్మక ఆలోచనలు” అనే అంశంపై స్వామి చిదానంద గిరి

1. జీవితం యొక్క దివ్య ఉద్దేశ్యాన్ని తెలియచేసే సార్వత్రిక దృక్పథం — నైతిక మరియు ఆధ్యాత్మిక అర్థాన్ని కోల్పోయిన ఆధునిక నాగరికత కోసం. యోగానందగారు భారతదేశం యొక్క ప్రాచీన సనాతన ధర్మాన్ని (“శాశ్వతమైన సత్యసూత్రాలు”) స్వీకరించి, అవి ఆధునిక యుగంలో పురుషులు మరియు స్త్రీలకు అర్థమయ్యేలా, నమ్మదగినవిగా మరియు ముఖ్యంగా వారికి వర్తించే విధంగా పునరుద్ధరించారు. అలా చేయడం ద్వారా, ఆయన మనస్తత్వశాస్త్రం, మతం, వైద్యం, విద్య మరియు ఎన్నో విషయాలకు సంబంధించిన అత్యాధునికమైన ఆలోచనలు మరియు అభ్యాసాల క్రమాన్ని ప్రపంచానికి పరిచయం చేశారు, కాలం గడిచేకొద్దీ అవి ప్రజల మనస్సులలో పాతుకుపోయాయి. ఆయన మనకు అందించింది ఈ మాత్రమే అయినా, అది ఎంతో ప్రాముఖ్యమైనదవుతుంది. కానీ ఆ జాబితా ఇంకా కొనసాగుతుంది.

2. ఆధునిక స్త్రీ పురుషులకు భగవంతుడిని చేరువగా, ముఖ్యమైనదిగా మరియు కోరదగినదిగా చేసే దైవ భావన. దేవుడు ప్రతీకారము తీర్చుకొనే న్యాయమూర్తిగా పాశ్చాత్య దేశాలలో అనేకమందికి సాధారణంగా ఉన్న తప్పుడు భావనను పరమహంసగారు పూర్తిగా తొలగించారు. బదులుగా, నిత్యనూతన ఆనందమే దేవుని స్వభావమని ఆయన బోధించారు; మరియు దేవుని స్వరూపంలోనే రూపొందించబడిన మానవులు, దేవుడిని తండ్రి, తల్లి, స్నేహితుడు, దివ్య ప్రేమికుడిగా, లేదా ఆత్మను వ్యక్తంచేసే గుణాలైన అనంతమైన ఆనందం, జ్ఞానం, కాంతి, శాంతి మరియు ప్రేమలలో ఏదో ఒకదానిగా తెలుసుకోవచ్చు.

ఈ విప్లవాత్మకమైన దేవుని భావన ప్రపంచంలోని చాలా ప్రాంతాల్లో పెరిగి స్థిరంగా పాదుకొన్నది. కాబట్టి, గతంలోని మీ మతపరమైన పెంపకం కారణంగా “దేవుడు” అనే పదంతో ఇబ్బందులు ఉన్నవారిలో మీరూ ఒకరయితే, వై.ఎస్.ఎస్. పాఠాల కోసం పరమహంసగారి “ఆత్మ-సాక్షాత్కారం ద్వారా అత్యున్నత విజయాలు” అనే పరిచయ పాఠాన్ని చదివి మీకు మీరే సహాయం చేసుకోండి. “దేవుడు అంటే ఏమిటి?” అనే విషయం మీద ఒక పూర్తి విభాగం ఉంది, ఇది మీకు చాలా భిన్నమైన దృష్టికోణాన్ని ఇస్తుందని నేను భావిస్తున్నాను.

3. దైవ-సాక్షాత్కార స్థితిని ప్రతి ఒక్కరు సాధించడానికి అవసరమయిన దశలవారీ సూచనల సాధనా సముదాయం.

4. మానవజాతి మరియు సర్వ సత్యమతాల ఆవశ్యకమైన ఐక్య దర్శనం. ఒకసారి పరమహంస యోగానందగారు ఎంతో అందంగా ఇలా అన్నారు: “ఏసుక్రీస్తు లేదా శ్రీకృష్ణుడు లేదా సనాతన ఋషులు ఏ వ్యక్తినయినా క్రైస్తవుడు, హిందువు, యూదుడు మొదలైన పేర్లతో పిలవడాన్ని నేను ఊహించలేను, ప్రతి వ్యక్తిని వాళ్ళు ‘నా సోదరుడు’ అని పిలవడాన్నే నేను ఊహించగలను.”

ఆ భావన అందంగా ఉంది కదా? సత్యమైన ఆధ్యాత్మిక మార్గాలన్నిటిలో ఉన్న ఏకత్వాన్ని మనకోసం మనం గ్రహించగలిగేలా దర్శనశక్తిని, అవకాశాన్ని పరమహంసగారు మనకు అందించారు — మరియు మానవులందరికీ ఆ అవగాహనను విస్తరింపజేశారు. క్రైస్తవ మతం మరియు హిందూ మతం యొక్క ప్రధాన గ్రంథాలపై తన సంచలనాత్మక వ్యాఖ్యానాల ద్వారా, ఈ మార్గాలు రెండు ఒక సాధారణ శాస్త్రీయ పునాదిని పంచుకుంటాయని ఆయన చూపించారు — ధ్యానం యొక్క ఖచ్చితమైన పద్ధతులను సాధన చేయడం వల్ల మతాలన్నిటికీ, మానవులందరికీ, సృష్టి అంతటికీ ఆధారమైన ఒకే సత్యాన్ని ప్రత్యక్ష వ్యక్తిగత అనుభవంగా పొందడానికి మార్గం ఏర్పరుస్తుంది.

పరమహంసగారు తీసుకువచ్చిన పరిమాణం నుండి రవంతైనా పొందడం మీరు ప్రారంభిస్తున్నారా? నిజంగా విప్లవాత్మకమైన (Truly epoch-making) — ఆయనను ఈ ప్రపంచానికి అందించమని చెప్పబడిన బోధనలను వర్ణించడానికి ఆయన ఉపయోగించిన పదం ఇది.

5. శరీరం, మనస్సు మరియు ఆత్మ యొక్క సంతులిత అభివృద్ధి కోసం “జీవించడం-ఎలా” అనే సూత్రాల యొక్క సంపూర్ణ ప్రణాళిక. 70 సంవత్సరాల క్రితం పరమహంసగారి రచనలు, వ్యాసాలు మరియు ఉపన్యాసాల నుండి సంగ్రహించబడిన యోగదా సత్సంగ పాఠాలు చదివినప్పుడు, ఆయనకు ఎంత దూరదృష్టి ఉందో మీరు గ్రహిస్తారు.

ఆయన తీసుకువచ్చిన సంతులిత లేదా సంపూర్ణమైన జీవనశైలి, చాలా ముఖ్యమైన అంశాలను ప్రపంచానికి పరిచయం చేయడానికి నిజంగా సహాయపడింది, ఇప్పుడు అవి మానవ శ్రేయస్సుకు శాస్త్రీయ ప్రాతిపదికగా సూచించబడుతున్నాయి.

6. గురుశిష్య సంబంధాన్ని సరైన రీతిలో అవగాహన చేసుకోవడం. ప్రాచీన కాలం నుండి గురుశిష్య సంబంధం చిత్తశుద్ధిగల దైవాన్వేషకులకు — సత్యాన్ని చిత్తశుద్ధితో అన్వేషించేవారికి — దైవసాక్షాత్కార మార్గంలో పురోగమించడానికి ఒక సాధనంగా ఉన్నది. ఇంకా ఆ సంబంధం యొక్క నిజమైన అర్థం ఇటీవలి శతాబ్దాలలో మరుగున పడిపోయింది మరియు క్షీణించిపోయింది. కానీ మన గురుదేవులు తన జీవితంలో దానికి దృష్టాంతంగా నిలిచి, తన దగ్గర ఉన్నవారికి అదే శిక్షణ ఇచ్చారు, తద్ద్వారా మనందరికీ అది విస్తరించబడినది, ఆ పవిత్రమైన గురుశిష్య సంబంధం యొక్క నిజమైన అర్థాన్ని ప్రపంచానికి తిరిగి ఇవ్వడం చూస్తున్నాము.

కాబట్టి, మనందరి ప్రయోజనం కోసం ఆయన తీసుకువచ్చిన దానిలో ఇవి కొన్ని ముఖ్యమైన అంశాలు. నేను వీటిని ఎందుకు ప్రస్తావిస్తున్నానంటే, చరిత్రలో ఈ క్షణంలో ప్రపంచం పరిష్కరించాల్సిన వాటిని అవి సూచిస్తాయి — లక్షణాలు మాత్రమే కాదు, ఈ రోజు మనం ఎదుర్కొంటున్న సమస్యలకు మూల కారణాలు….