ನಿತ್ಯ ಸಂತೋಷದ ರಹಸ್ಯಗಳು

ನೀವು ಆಳವಾಗಿ ಧ್ಯಾನ ಮಾಡಿದಷ್ಟೂ, ಹೆಚ್ಚು ಇಷ್ಟಪಟ್ಟು ಸೇವೆ ಮಾಡಿದಷ್ಟೂ, ಹೆಚ್ಚು ಸುಖಿಗಳಾಗುವಿರಿ.

ಧ್ಯಾನದ ಮೂಲಕ ಹಾಗೂ ನಿಮ್ಮ ಪ್ರಜ್ಞೆಯನ್ನು ನಿತ್ಯ ಅಸ್ತಿತ್ವ, ನಿತ್ಯ ಪ್ರಜ್ಞ ಮತ್ತು ನಿತ್ಯ ನೂತನ ಆನಂದವಾದ ಭಗವಂತನಲ್ಲಿ ಶ್ರುತಿಗೊಳಿಸುವ ಮೂಲಕ ಸಂತೋಷದ ಎಲ್ಲ ಸ್ಥಿತಿಗಳನ್ನು ನಿಮ್ಮೊಳಗೆ ಹೊಂದಲು ಪ್ರಯತ್ನಿಸಿ. ನಿಮ್ಮ ಸಂತೋಷವು ಎಂದಿಗೂ ಹೊರಗಿನ ಪ್ರಭಾವಕ್ಕೆ ಒಳಗಾಗಬಾರದು. ನಿಮ್ಮ ಪರಿಸರ ಹೇಗೇ ಇರಲಿ, ಅದು ನಿಮ್ಮ ಶಾಂತಿಯನ್ನು ಕದಡಲು ಅವಕಾಶ ಕೊಡಬೇಡಿ.

ನಿಜವಾದ ಸಂತೋಷವು ಬಾಹ್ಯ ಅನುಭವಗಳ ಎಲ್ಲಾ ಸವಾಲುಗಳನ್ನು ಎದುರಿಸಬಲ್ಲುದು. ನಿಮ್ಮ ವಿರುದ್ಧ ಬೇರೆಯವರು ಮಾಡುವ ಹಿಂಸೆಗಳನ್ನು ಸಹಿಸಿಕೊಂಡೂ ಪ್ರೀತಿ ಮತ್ತು ಶಾಂತಿಯನ್ನು ಹಿಂದುರಿಗಿಸಬಲ್ಲಿರಾದರೆ; ಬಾಹ್ಯ ಪರಿಸ್ಥಿತಿಗಳ ಎಲ್ಲ ಯಾತನಾಮಯ ಒತ್ತಡಗಳ ಹೊರತಾಗಿಯೂ ನಿಮ್ಮ ದಿವ್ಯ ಆಂತರಿಕ ಶಾಂತಿಯನ್ನು ನೀವು ಕಾಪಾಡಿಕೊಂಡು ಬರಲು ಸಾಧ್ಯವಾದರೆ, ಆಗ ನಿಮಗೆ ಈ ಸಂತೋಷವೆಂದರೆ ಏನೆಂದು ಅರ್ಥವಾಗುತ್ತದೆ.

ಪ್ರತಿ ರಾತ್ರಿ ಮಲಗುವ ಮುನ್ನ ಹಾಗೂ ಪುನಃ ಬೆಳಿಗ್ಗೆ ದಿನದ ಚಟುವಟಿಕೆಗಳನ್ನು ಆರಂಭಿಸುವ ಮುನ್ನ, ಕನಿಷ್ಠ ಅರ್ಧ ಗಂಟೆ ಅಥವಾ ಅದಕ್ಕಿಂತ ಹೆಚ್ಚು ಸಮಯ, ಮೌನ ಮತ್ತು ಶಾಂತಿಯಿಂದ [ಧ್ಯಾನದಲ್ಲಿ] ಇರಿ. ಇದು ನಿಮ್ಮಲ್ಲಿ ನಿರ್ಭೀತ ಮತ್ತು ಅಭೇದ್ಯವಾದ ಅಭ್ಯಾಸ ಬಲದ ಅಂತರಂಗದ ಸಂತೋಷವನ್ನುಂಟುಮಾಡಿ, ನಿಮಗೆ ಜೀವನದ ದೈನಂದಿನ ಹೋರಾಟದಲ್ಲಿ ಎಲ್ಲ ಕಷ್ಟಕರ ಪರಿಸ್ಥಿತಿಗಳನ್ನು ಎದುರಿಸಲು ಸಹಾಯ ಮಾಡುತ್ತದೆ. ಅಂತರಂಗದಲ್ಲಿ ಅಂತಹ ಬದಲಾಗದ ಸಂತೋಷವನ್ನಿಟ್ಟುಕೊಂಡು, ನಿಮ್ಮ ದೈನಂದಿನ ಅವಶ್ಯಕತೆಗಳನ್ನು ಪೂರೈಸಿಕೊಳ್ಳಲು ಹೊರಡಿ.

ಸಂತೋಷಕ್ಕಾಗಿ ಬಾಹ್ಯ ಪರಿಸ್ಥಿತಿಗಳನ್ನು ಅವಲಂಬಿಸಿದಷ್ಟೂ ನಿಮಗೆ ಸಂತೋಷದ ಅನುಭವವು ಕಡಿಮೆಯಾಗುತ್ತದೆ.

ಭಗವಂತನನ್ನು ಮರೆತು ಸಂತೋಷದಿಂದಿರಬಹುದು ಎಂದು ನೀವು ತಿಳಿದಿದ್ದರೆ, ಅದು ನಿಮ್ಮ ತಪ್ಪು ತಿಳುವಳಿಕೆ, ಏಕೆಂದರೆ ವಿಶ್ವದಲ್ಲಿ ಏಕೈಕ ವಾಸ್ತವವಾದ ಭಗವಂತನೇ ಸರ್ವಸ್ವ ಎಂದು ನಿಮಗೆ ಅರಿವಾಗುವವರೆಗೂ ನೀವು ಮತ್ತೆ ಮತ್ತೆ ಒಂಟಿತನದಲ್ಲಿ ಅಳುತ್ತಿರುತ್ತೀರಿ. ನೀವು ಅವನ ಪ್ರತಿಬಿಂಬದಂತೆಯೇ ಮಾಡಲ್ಪಟ್ಟಿದ್ದೀರಿ. ನಿಮಗೆ ಶಾಶ್ವತ ಸುಖ ಯಾವುದರಲ್ಲೂ ಸಿಗುವುದಿಲ್ಲ, ಏಕೆಂದರೆ ಭಗವಂತನಲ್ಲದೆ ಬೇರಾವುದೂ ಪರಿಪೂರ್ಣವಲ್ಲ.

ಪ್ರಭುವಿನ ಸಾನ್ನಿಧ್ಯದಲ್ಲಿ ನಾನು ಕಂಡುಕೊಳ್ಳುವ ಪರಿಶುದ್ಧ ಸಂತೋಷವನ್ನು ಯಾವ ಶಬ್ದಗಳೂ ವರ್ಣಿಸಲಾರವು. ಹಗಲೂ ರಾತ್ರಿ ನಾನು ಆನಂದದ ಸ್ಥಿತಿಯಲ್ಲಿರುತ್ತೇನೆ. ಆ ಆನಂದವೇ ಭಗವಂತ. ಅವನನ್ನು ಅರಿಯುವುದೆಂದರೆ ನಿಮ್ಮ ಎಲ್ಲ ದುಃಖಗಳ ಅಂತ್ಯಕ್ರಿಯೆ ಮಾಡಿದಂತೆ. ನೀವು ಭಾವರಹಿತವಾಗಿಯೂ ಮಂಕಾಗಿಯೂ ಇರಬೇಕೆಂದು ಅವನು ಬಯಸುವುದಿಲ್ಲ. ಇದು ಭಗವಂತನ ಬಗೆಗಿನ ಸರಿಯಾದ ಕಲ್ಪನೆಯಲ್ಲ, ಅವನನ್ನು ಸಂತೋಷಪಡಿಸುವ ಮಾರ್ಗವೂ ಅಲ್ಲ. ಸಂತೋಷದಿಂದಿರದಿದ್ದರೆ ನಿಮಗೆ ಭಗವಂತನನ್ನು ಕಂಡುಕೊಳ್ಳಲು ಸಾಮರ್ಥ್ಯವೂ ಇರುವುದಿಲ್ಲ…ನೀವು ಹೆಚ್ಚು ಸಂತೋಷಿಗಳಾದಷ್ಟೂ ಅವನೊಂದಿಗೆ ಹೆಚ್ಚು ಶ್ರುತಿಗೊಳ್ಳುವಿರಿ. ಅವನನ್ನು ಅರಿತವರು ಸದಾ ಸಂತೋಷದಿಂದಿರುತ್ತಾರೆ, ಏಕೆಂದರೆ ಭಗವಂತನು ಆನಂದವೇ ಆಗಿದ್ದಾನೆ.