ಭಯ, ಒತ್ತಡ ಮತ್ತು ಚಿಂತೆಯನ್ನು ಜಯಿಸುವುದು

ಇಚ್ಛಾಶಕ್ತಿಯೊಂದಿಗೆ ಬಿಗಿಗೊಳಿಸಿ (Tense): ಇಚ್ಛಾಶಕ್ತಿಯ ಆದೇಶದಿಂದ ಪ್ರಾಣಶಕ್ತಿಯು (ಬಿಗಿಗೊಳಿಸುವುದರ ಮೂಲಕ) ಇಡೀ ದೇಹದ ಯಾವುದೇ ಭಾಗವನ್ನು ತುಂಬಿಕೊಳ್ಳುವಂತೆ ನಿರ್ದೇಶಿಸಿ. ಅಲ್ಲಿ ಚೈತನ್ಯವುಶಕ್ತಿ ತುಂಬುತ್ತ, ಹೊಸ ಚೈತನ್ಯ ನೀಡುತ್ತ, ಅನುರಣಿಸುತ್ತಿರುವುದನ್ನು ಅನುಭವಿಸಿ. ದೇಹವನ್ನು ಸಡಿಲಿಸಿ, ಅನುಭವಿಸಿ: ಬಿಗಿತವನ್ನು ಸಡಿಲಿಸಿ, ಹಾಗೂ ನವ ಚೈತನ್ಯ ಮತ್ತು ಜೀವಶಕ್ತಿಯ ಹಿತವಾದ ಪುಳಕವನ್ನು ಪುನಶ್ಚೇತನಗೊಳಿಸಲ್ಪಟ್ಟ ಭಾಗದಲ್ಲಿ ಅನುಭವಿಸಿ. ನೀವು ಶರೀರವಲ್ಲ ಎಂಬುದನ್ನು ಅರಿಯಿರಿ; ನೀವು, ಈ ಶರೀರಕ್ಕೆ ಆಧಾರವಾಗಿರುವಂತಹ ಚೈತನ್ಯವೇ ಆಗಿರುವಿರಿ. ಈ ತಂತ್ರದ ಅಭ್ಯಾಸದಿಂದ ಉಂಟಾದ ನಿಶ್ಚಲತೆಯಿಂದ ಬರುವ ಶಾಂತಿಯನ್ನು, ಸ್ವಾತಂತ್ರ್ಯವನ್ನು ಹಾಗೂ ಹೆಚ್ಚಾದ ಅರಿವನ್ನು ಅನುಭವಿಸಿ.

ಜನರು ನನ್ನ ಬಳಿ ಬಂದು ಅವರ ಚಿಂತೆಗಳ ಬಗ್ಗೆ ಮಾತನಾಡುತ್ತಾರೆ. ನಾನವರಿಗೆ ಶಾಂತವಾಗಿ ಕುಳಿತು ಕೊಳ್ಳುವಂತೆ, ಧ್ಯಾನಿಸುವಂತೆ ಮತ್ತು ಪ್ರಾರ್ಥಿಸುವಂತೆ ಒತ್ತಾಯಿಸುತ್ತೇನೆ; ಆಂತರಿಕ ಶಾಂತತೆಯ ಭಾವವನ್ನು ಅನುಭವಿಸಿದಾಗ, ಸಮಸ್ಯೆಯ ಪರ್ಯಾಯ ಮಾರ್ಗಗಳನ್ನು ಯೋಚಿಸಿದಾಗ, ಆ ಸಮಸ್ಯೆಯ ಪರಿಹಾರ ಅಥವಾ ನಿವಾರಣೆಯು ದೊರಕುತ್ತದೆ. ಭಗವಂತನಲ್ಲಿ ಮನಸ್ಸು ಶಾಂತವಾಗಿದ್ದಾಗ, ಭಗವಂತನಲ್ಲಿ ಶ್ರದ್ಧೆ ದೃಢವಾಗಿದ್ದಾಗ, ಅವರು ತಮ್ಮ ಸಮಸ್ಯೆಗೆ ಪರಿಹಾರವನ್ನು ಕಂಡುಕೊಳ್ಳುತ್ತಾರೆ. ಕೇವಲ ಸಮಸ್ಯೆಗಳನ್ನು ನಿರ್ಲಕ್ಷಿಸಿದರೆ ಅಥವಾ ಅವುಗಳನ್ನು ಚಿಂತಿಸುತ್ತಿದ್ದರೆ ಪರಿಹಾರ ದೊರಕಲಾರದು. ನೀವು ಶಾಂತವಾಗುವವರೆಗೂ ಧ್ಯಾನ ಮಾಡಿ; ನಂತರ ನಿಮ್ಮ ಮನಸ್ಸನ್ನು ಸಮಸ್ಯೆಯ ಮೇಲಿಟ್ಟು, ಭಗವಂತನ ಸಹಾಯಕ್ಕಾಗಿ ಆಳವಾಗಿ ಪ್ರಾರ್ಥಿಸಿ. ಸಮಸ್ಯೆಯ ಮೇಲೆ ನಿಮ್ಮ ಗಮನವಿರಲಿ, ಚಿಂತೆಯ ಕಷ್ಟಕರ ಉದ್ವೇಗಕ್ಕೆ ಒಳಗಾಗದೇ, ನೀವು ಪರಿಹಾರವನ್ನು ಕಂಡುಕೊಳ್ಳುವಿರಿ.

ನಿಮ್ಮ ಮನಸ್ಸು ಅಸಂಖ್ಯಾತ ಕಾರಣಗಳನ್ನು ಕೊಟ್ಟ ನಂತರವೂ, ನಿಮ್ಮೊಳಗೆ ಶಾಂತಿಯ ಅನುಭವವಾಗುವವರೆಗೂ ನೀವು ಕುಳಿತು ಭಗವಂತನ ಧ್ಯಾನವನ್ನು, ಮಾಡಬೇಕೆಂದು ನೆನಪಿಡಿ. ನಂತರ ಭಗವಂತನಿಗೆ ಹೇಳಿ, “ನಾನು ಕೋಟ್ಯಾಂತರ ರೀತಿಯಲ್ಲಿ ಯೋಚಿಸಿದರೂ, ನನ್ನ ಸಮಸ್ಯೆಯನ್ನು ನಾನೊಬ್ಬನೇ ಪರಿಹರಿಸಿಕೊಳ್ಳಲಾರೆ. ಆದರೆ ಅದನ್ನು ನಿನ್ನ ಕೈಗಳಲ್ಲಿ ಇರಿಸಿದಾಗಲೇ ನಾನು ಪರಿಹರಿಸಿಕೊಳ್ಳಲು ಸಾಧ್ಯ, ಮೊದಲು ನಿನ್ನ ಮಾರ್ಗದರ್ಶನವನ್ನು ಕೋರಿ, ನಂತರ, ಸಾಧ್ಯವಿರಬಹುದಾದ ಪರಿಹಾರಕ್ಕಾಗಿ ಎಲ್ಲ ದೃಷ್ಟಿಕೋನಗಳಿಂದ ಯೋಚಿಸುವುದರ ಮೂಲಕ.” ಸ್ವಸಹಾಯ ಮಾಡಿಕೊಳ್ಳುವವರಿಗೆ ದೇವರು ಸಹಾಯ ಮಾಡೇ ಮಾಡುತ್ತಾನೆ. ಧ್ಯಾನದಲ್ಲಿ ನೀವು ದೇವರನ್ನು ಪ್ರಾರ್ಥಿಸಿದ ನಂತರ ನಿಮ್ಮ ಮನವು ಶಾಂತಿ ಮತ್ತು ವಿಶ್ವಾಸದಿಂದ ತುಂಬಿದಾಗ, ನೀವು ನಿಮ್ಮ ಸಮಸ್ಯೆಗಳಿಗೆ ವಿವಿಧ ಪರಿಹಾರಗಳನ್ನು ಕಾಣುತ್ತೀರಿ; ನಿಮ್ಮ ಮನಸ್ಸು ಶಾಂತವಾಗಿರುವುದರಿಂದ ನೀವು ಅದರಲ್ಲಿ ಉತ್ತಮವಾದುದನ್ನು ಆಯ್ಕೆಮಾಡಿಕೊಳ್ಳಲು ಸಮರ್ಥರಾಗುತ್ತೀರಿ. ಈ ಪರಿಹಾರ ಮಾರ್ಗವನ್ನು ಅನುಸರಿಸಿ, ಆಗ ನೀವು ಯಶಸ್ಸನ್ನು ಕಂಡುಕೊಳ್ಳುವಿರಿ. ಇದು ನಿಮ್ಮ ದೈನಂದಿನ ಜೀವನದಲ್ಲಿ ಧರ್ಮದ ವಿಜ್ಞಾನವನ್ನು ಅನ್ವಯಿಸುವ ಬಗೆಯಾಗಿದೆ.

ನಾವು ಎಷ್ಟೇ ಕಾರ್ಯ ನಿರತರಾಗಿದ್ದರೂ ಆಗಿಂದಾಗ್ಗೆ ನಮ್ಮ ಮನಸ್ಸನ್ನು ಚಿಂತೆಗಳಿಂದ ಮತ್ತು ಎಲ್ಲ ಕರ್ತವ್ಯಗಳಿಂದ ಸಂಪೂರ್ಣವಾಗಿ ಮುಕ್ತಗೊಳಿಸಲು ಮರೆಯಬಾರದು….ಅದರಲ್ಲೂ ವಿಶೇಷವಾಗಿ, ಚಿಂತಿತ- ರಾಗಿದ್ದಾಗ ಸತತವಾಗಿ ಒಂದು ನಿಮಿಷದವರೆಗೆ ನಕಾರಾತ್ಮಕವಾಗಿ ಚಿಂತಿಸದೆ, ಮನಸ್ಸನ್ನು ಅಂತರಂಗದ ಶಾಂತಿಯಲ್ಲಿ ನೆಲೆಗೊಳಿಸಿ. ನಂತರ ನಾವು ಹಲವು ನಿಮಿಷಗಳವರೆಗೆ ಶಾಂತವಾದ ಮನಸ್ಸಿನಿಂದ ಇರಲು ಪ್ರಯತ್ನಿಸಬೇಕು. ಅದಾದ ನಂತರ ಒಂದು ಒಳ್ಳೆಯ ಘಟನೆಯನ್ನು ನೆನಪಿಸಿಕೊಳ್ಳಿ; ಅದನ್ನೇ ಕುರಿತು ಯೋಚಿಸಿ ಮತ್ತು ಅದನ್ನು ಕಣ್ಣ ಮುಂದೆ ತಂದುಕೊಳ್ಳಿ; ಚಿಂತೆಗಳನ್ನು ಸಂಪೂರ್ಣವಾಗಿ ಮರೆಯುವವರೆಗೆ ಒಂದು ಸಂತೋಷಕರವಾದ ಅನುಭವವನ್ನು ಮಾನಸಿಕವಾಗಿ ಮತ್ತೆ ಮತ್ತೆ ಅನುಭವಿಸಿ.

ಯೋಚನೆ ಮಾಡುವ, ಮಾತನಾಡುವ, ಅನುಭವಿಸುವ ಮತ್ತು ವ್ಯವಹರಿಸುವ ಎಲ್ಲಾ ಶಕ್ತಿಗಳು ಭಗವಂತನಿಂದ ಬರುತ್ತವೆ ಹಾಗೂ ಅವನು ಸದಾ ನಮ್ಮೊಂದಿಗಿದ್ದು ನಮ್ಮನ್ನು ಪ್ರೋತ್ಸಾಹಿಸುತ್ತ ಮಾರ್ಗದರ್ಶಿಸುತ್ತಿದ್ದಾನೆ ಎಂಬ ಅರಿವು, ಆ ಕೂಡಲೇ ನರೋದ್ರೇಕದಿಂದ ಮುಕ್ತಿ ನೀಡುತ್ತದೆ. ಈ ಅರಿವಿನೊಂದಿಗೆ ದಿವ್ಯಾನಂದದ ಸ್ಪುರಣಗಳು ಕಾಣಿಸಿಕೊಳ್ಳುತ್ತವೆ; ಕೆಲವೊಮ್ಮೆ ಒಂದು ಆಳವಾದ ಜ್ಞಾನೋದಯ ನಮ್ಮನ್ನು ಆವರಿಸುತ್ತದೆ, ಅದು ಭಯದ ಪರಿಕಲ್ಪನೆಯನ್ನೇ ತೊಡೆದುಹಾಕುತ್ತದೆ. ಭಗವಂತನ ಶಕ್ತಿಯು ಸಾಗರದಂತೆ ಒಳಹರಿದು, ಸ್ವಚ್ಛಗೊಳಿಸುವ ಪ್ರವಾಹದಂತೆ ಹೃದಯದ ಮೂಲಕ ಉಕ್ಕಿ ಹರಿಯುತ್ತ ಭ್ರಮಾಲೋಕದ ಎಲ್ಲ ಸಂದೇಹ, ನರೋದ್ರೇಕ ಮತ್ತು ಭಯಗಳನ್ನು ಅಳಿಸಿಹಾಕುತ್ತದೆ. ಭೌತ ವಿಷಯಗಳ ಭ್ರಾಂತಿಯಾದ, ಕೇವಲ ತಾನೊಂದು ನಶ್ವರ ದೇಹವೆಂಬ ಪ್ರಜ್ಞೆಯನ್ನು ಭಗವಂತನ ಮಧುರವಾದ ಪ್ರಶಾಂತತೆಯ ಸಂಪರ್ಕ ಹೊಂದುವ ಮೂಲಕ ಮೀರಿಹೋಗಬಹುದು, ಅದು ದೈನಂದಿನ ಧ್ಯಾನದಿಂದ ಮಾತ್ರ ಸಾಧ್ಯ. ಆಗ ನಮಗೆ, ಭಗವಂತನ ವಿಶ್ವ ಸಾಗರದಲ್ಲಿ ದೇಹವು ಚೈತನ್ಯದ ಒಂದು ಸಣ್ಣ ನೀರ್ಗುಳ್ಳೆ ಎಂಬ ಅರಿವಾಗುತ್ತದೆ.

ಭಗವಂತನನ್ನು ಪಡೆಯಲು ಅತ್ಯುನ್ನತ ಪ್ರಯತ್ನ ಮಾಡಿ. ಪ್ರಾಯೋಗಿಕವಾದ ಸತ್ಯವನ್ನೇ ನಾನು ನಿಮಗೆ ವ್ಯವಹಾರಿಕವಾಗಿ ಹೇಳುತ್ತಿದ್ದೇನೆ; ಹಾಗೂ ನಿಮ್ಮ ಪ್ರಜ್ಞೆಯಲ್ಲಿರುವ ಎಲ್ಲ ನೋವನ್ನು ನಿವಾರಿಸುವ ಆ ತತ್ವವನ್ನೇ ನೀಡುತ್ತಿರುವೆ. ಯಾವುದಕ್ಕೂ ಹೆದರದಿರಿ….ಆಳವಾಗಿ ಶ್ರದ್ಧೆಯಿಂದ ಧ್ಯಾನ ಮಾಡಿ. ಆಗ ಒಂದು ದಿನ ಭಗವಂತನೊಂದಿಗೆ ಆನಂದದಲ್ಲಿ ಎಚ್ಚರಗೊಂಡು ಜನರು ತಾವು ಕಷ್ಟಪಡುತ್ತಿದ್ದೇವೆ ಎಂದು ಕೊಳ್ಳುವುದು ಎಂತಹ ಮೂರ್ಖತನ ಎನ್ನುವುದು ಅರಿವಾಗುತ್ತದೆ. ನೀವೂ, ನಾನು ಮತ್ತು ಅವರೆಲ್ಲರೂ ಪರಿಶುದ್ಧ ಚೈತನ್ಯರು.